Partidarik gogorrena?

Jokatutako partida pilotariei eskertu nahirik, artean ikusleak txaloka ari ziren; batzuk zutik eta gainerakoak jarrita, baina guztiak txaloka. Lau pilotariak elkar agurtzen, pilotalekuaren erdian. Oraingo telofono hauek atsedenik ez dute hartzen eta, hara hor zer idazten didan WhatsAppez adiskide batek: “Partidu bikaina. Jendea gustura”. Ez dago hain hitz gutxitan arratsaldeak emana laburbiltzerik.

Continuar leyendo «Partidarik gogorrena?»

Larrazabal, aintzat hartzeko pilotaria

Iker Larrazabal

Antiguara hurbiltzen den pilotazale asko jokalari berriak ikusteko irrikaz etortzen da, edota joan den urtetik hona gazte batek egin dituen aurrerapenak ikustera.  Azken hauen artean leudeke De la Fuente, Unai Alberdi…eta baita ere Larrazabal gaztea. 17 urte bete berriak ditu Amurriokoak, eta lehen aldia da Antiguan jokatzen duela. Eta pilotazale askoren iritzia jaso ondoren, zera esatera gatoz: “Zaintzen badute, pilotari-ezpal ona dago hemen”.

Continuar leyendo «Larrazabal, aintzat hartzeko pilotaria»

Eskerrik beroenak, Josu Zezeaga

Josu Zezeaga

Egizu kontu, irakurle, Kantabriako Noja herrian zaudela zure oporraldian, lasai ederrean. Astearte ilunabarra da; areago, gaua izan liteke asko eta askorentzat, egunak ordurik gehienak emanak ditu eta. Halako batean, telofono dei bat dator zure mugikorrera.

   −Bai, esan…

   -Josu, Antiguotik deitzen diat atzelari bat behar diagu eta… Barkatu desorduetan deitu izana, baina… Izanez ere, programatua zegoenak eskuak galdu omen dizkik partiduren batean…

   −Baina, nola deitzen didazue une honetan, oporretan nagoenean… Nojan.

Continuar leyendo «Eskerrik beroenak, Josu Zezeaga»

PILOTARI LEHIAKORRAK ETA GAINERAKOAK

Ioritz Egiguren partida aurretik

Antiguako Txapelketa abiatu berria da bere bidean. Ez dago gauza asko esaterik, atea irekitzen baino ez dugu ikusi eta. Dena den,  uztailaren 2 eta 3ko partidak ikusi dituen pilotazale jakintsu eta fin batek azalpen hau eskaini zidan: −“Bi egunotan  pilotari mota bi ikusi ditut. Alde handia dago batzuen eta besteen artean. Batzuk, arratsalde-pasa etorriko zaizkizu pilotalekura, festa giroan baleude bezala… Horiek ez daukate zer eginik Antiguoko txapelketa bezalako batean. Beste batzuek, ordea, txapela amesten dute, urdeak ezkurra bezala.  Asteazkeneko bigarren partidan asko gustatu zitzaidan Ioritz Egiguren. Ez dakit zer egingo duen aurten, baina buru-belarri sartu da lehiaketan, nagusien mailako txapelarekin estali nahi du burua. Pilotazale on dena berehala ohartzen da horretaz”.

Continuar leyendo «PILOTARI LEHIAKORRAK ETA GAINERAKOAK»

ARANTZA TXIKI BAT

Beñat Rezusta
Beñat Rezusta

Aurtengo bi-bitako txapelketan finalera Ezkurdia-Zabaleta eta Elezkano II-Rezusta ailegatu dira. Ordu erdi bat hartu dugu finalistok Antiguoko Txapelketan zer nolako arrastoa utzi zuten ikusteko.

Guztietan nagusitzen dena Beñat Rezusta da. Gure txapelketari buruzko oroitzapenik gozoena berea izan beharko du. Izan ere, bi maila ezberdinetan iritsi baita txapela janztera. 2011koan, Gaillurrale aurrelari zuela, Artola-Santxo bikoteari 22-18 nagusitu zitzaion gazteen mailan. Hurrengo urtean, nagusien mailan, Xabier Urbietarekin, Garralda-Lizoain nafarrei gailendu zitzaien: 22-9. Bikote gogorra zen nafarra, baina erabat mendean hartu zituzten Urbieta-Rezustak.

Continuar leyendo «ARANTZA TXIKI BAT»

Migel Gallastegi, Aieteko Katxolako txotx-festan

Eguraldia ez zen izugarria martxoaren 17an; haizea indarrean, zerua guztiz beltza, eta aldian behin kazkabarra ere bai…Halaz guztiz, emandako hitza bete egin zuen Migel Gallastegik eta Katxola baserri izandakoan txotx-festan izan genuen eibartarra. Ospakizun samurra, atsegina izan zen alde guzietatik begiratuta ere: hitz dotoreak, bertso ederrak, trikiti-aire biziak… Miresmena eta esker oneko hitzak Migelenentzat. Giro atsegin hartan, Migel bera ere hiztun aritu zitzaigun, kontakizun zaharrak grazi ederrez berrituz. Dotoreak guztiak ere.

Katxola baserrian geundelarik, bere jaiotetxeaz hitz egin zigun, Arrateko Asoliartza baserriaz alegia. Etxe ederragorik, Migelen ustez! Baina, hizpide nagusia pilota izan zen, noski. Eta Mondragoeko Ezkerraren aurka jokatutakoaz hitz egin zigun. Sekula jokatu den partidarik ederrena, ezkerka. Bere ustez, 22-16 irabazi omen zion Zurdo de Mondragon handiari.

Continuar leyendo «Migel Gallastegi, Aieteko Katxolako txotx-festan»

​Egiguren-Bikuñak eta P.Labaka-Garmendiak bidea galanki erraztu

Egiguren-Bikuñak 22

Expósito-Cordónek 8

P.Labaka-Garmendiak 22

Prieto-Madariagak 16

Pilotazaleak egiazko finalerdi bat ikusi nahi zuen, hots, lana gogotik egin beharra, berriketa gutxi, tantoa menderatutakoan bakarrik gauza ausartak egitea…Bide horretatik joan da lehenbiziko partida. Hori horrela, Egiguren-Bikuñak erabat argi eta garbi ekarri duten euren egitekoa. Ahal izan ezkero, pilota Pablo Cordonén barrutian jarri behin eta berriz, eta bide batez Exposito baztertu. Hortik puskatu da hasiera hasieratik partida. Atzeko hormaren kontra jokatu behar izan duela adierazi digu Cordónek, eta handik ez zeukala gisazko lana egiteko modurik.  Gaurko partidua zela eta, ez dira memelokerietan erori, ez Egiguren tolosarra eta ez Bikuña donostiarra. Ongi ikasitako lezioarekin, pinbi-panba beti atzera joan…22ko geltokira iritsi arte.
Bigarren partidan nabarmendu den pilotari bat egin behar izan ezkero, Beñat Garmendiaren partida azpimarratu beharko genuke. Ez du parte-hartze disdiratsu horietako erakutsi baina, bere galoi eta guzti azaldu da plazan. “Asko jokatu beharko duzue, irabaztekotan” esanez bezala. Horren frutua izan da hasierako abiada, eta partida oso aldeko edukitzea lortu dute berehala. Ez ditu, ordea, loak hartu bizkaitarrak eta hamabosgarren tanto inguruan ez zitzaion irabazle garbirik ikusten partidari. Urak bere bidera ekartzea lortu Labaka-Garmendia bikoak azkenean, eta meritu osoz egin dira gaurko garaipenaren jabe. Markagailuak zintzo erakusten du kantxan egon den martxa, ets baita nagusitasuna ere.

Jendez, ikusle-kopuruz gustora antolatzaileak. Aurtengo sarrerarik onena: 450tik gora, oker handirik gabe. Hurrengo astearte-asteazkena ere interesez beterik datoz

Garmendia-P. Labaka, gaur arratsaldean, plazaratu aurretik